飲食 @ 大澳閒遊（三）

睇完Gwiyomi海豚，梳返好個頭，平伏返興奮的心情，繼續閒遊大澳的大街小巷，感受大澳風情！

 

  

大澳係一條水鄉漁村，海味當然出名！整條街都充滿咸魚蝦醬的獨有味道！

   

 

行行下，行左去民居，屋與屋相距好近！

 

仲發現有蟹仔同彈塗魚！

 

謹存的柴火煮食，D婆婆大約6點就食晚飯，事實上好多香港人都未收工！

 

 

大澳的貓仔都遊閒過人！

 

行行下見到有間咁有中國色彩的餐廳，連行入去的橋都彎彎曲曲咁有藝術感，大家都諗住入去休息一下！

在大澳眾多棚屋之中，這間的裝修設計可算是別具一格，顏色以黑白簡約為主，細微的地方也盡顯心思，好像窗框、欄杆、傢俱等都選用特製的木材，充滿中國味道，使人留下深刻印象。

 

 

 

不過呢…當我地12條友入到去先發現，原來這間唔係餐廳，而係大澳居民黃先生的私人居所！！而這房子的設計加建築均出自黃先生雙手，佩服！黃先生好好人，唔單只無趕我地走，仲攞左佢把珍藏油紙傘出黎，叫我地攞住黎影相有feel d！

 

這時候，有位朋友突然聞下把遮，之後好認真咁講：嘩，把遮真係好有魷魚味，怪唔知得叫魷魚傘啦！！哈哈哈哈，笑到我喊出黎！

就係咁，我地就好唔客氣地在人地屋企休息吹水影相睇風景玩，黃先生話12月大澳的日落特別靚，仲歡迎我地到時再黎佢屋企燒野食咁話！

坐下坐下都差唔多7點啦，又係時候食飯！

好似幾出名的蓮香酒樓

 

開始點菜，只係７點姐，好多海鮮已經賣晒，蝦賣晒、帶子賣晒…有無咁好生意！？

金銀蛋浸時菜

本身我都好喜愛咸蛋皮蛋，菜都好嫩，好食！

 

豉椒炒聖子

聖子幾大隻，無沙，爽口，醬汁太杰，有點漿口！

蝦醬炒通菜

未食已經聞到香味，蝦醬味濃度適中，必食！

海鮮豆腐湯

湯水同湯料分開上桌，方便食湯料，湯底材料豐富，用石九公、蝦、白菜、豆腐煲成奶白色，飲落去魚味鮮甜仲帶有少少薑味，很住家的感覺！

 

節瓜蝦米粉絲煲 

蝦米好大隻，但唔會好硬，整煲粉絲咸咸香香，不錯！

 

蝦醬蒸豬肉

較預期細碟左少少，豬肉有點肥但很香，味道偏咸，最好配白飯食！

 

咸蛋土魷蒸肉餅

不過不失，都係覺得屋企的肉餅好食ｄ！

 

招牌菜：墨魚餅併炸雲吞

墨魚新鮮，口感非常爽口彈牙，配自家製醬汁，不錯，值得一試！

炸雲吞外皮脆卜卜，內層的肉仍保持有肉汁，正！最搞笑有片菠蘿在碟底！
 

豉汁蒸白蟮

白蟮好新鮮，因為只有生猛劏而立即蒸熟的魚身才會縮起來或攣起來！而這條白蟮屬於爽口果種，不過我自己偏好淋身嫩滑的白蟮！

沙嗲粉絲蟹煲

膏蟹很多膏，沙嗲味偏濃，洋蔥同粉絲吸收晒Ｄ汁！！

大澳蓮香酒家

地址: 大澳吉慶街52號地下
平均消費: $180

 

文偽青年今天以一首新詩為大澳之行就此作結。

<再別大澳>

輕輕的我走到大澳，

連一片蝦膏也沒有帶走，

卻重重的回來了！

完


飲食 @ 大澳閒遊（三）
----------------------------------------------
你肯KEEP住睇, 我肯KEEP住寫!
contact me: twentyonestyle@yahoo.com.hk

http://twentyonestyle.blogspot.hk/
http://twentyone.theztyle.com
http://blog.she.com/twentyone
http://blog.qooza.hk/twentyonestyle
http://www.openrice.com/restaurant/userinfo.htm?userid=756192