飲食 @ 大澳閒遊 (一)

最近受到腰骨痛困擾，留在家中寫Blog成為我最佳的假期活動。

 

上星期同朋友入左大澳，天文台預測會落大雨，但出發當日個天氣同我地個個的心情一樣咁好！

 

大澳點去？

東涌港鐵站B出口，搵巴士總站搭11號巴士，果日星期日去，超級多人等車都等左1個鍾，車程約40分鐘，坐車途中仲會見到牛群在路邊好free咁曬太陽！

一落巴士就已經嗅到淡淡的蝦醬味，令無食早餐的我更加肚餓，唔洗講咁多，立即搵野食午餐！‘東方小祇園’的位置唔係鬧市區，沿途不斷問路加google map，終於到達目的地！

鹽焗雞＜推介＞

有驚喜的一道菜，隻雞除左有雞味，仲有好香的薑蔥調味，最難得嘅地方係雞皮食落口仲係脆嫁，加上因為焗過的關係，皮下的肥膏都少左好多，感覺上健康ｄ又好食ｄ！有機會都好想帶我亞婆黎試下，佢出左名係一名‘雞精’，甚至曾經講過如果以後只可以食一種食物的話，一定會選擇雞！真係好浮誇！哈哈！

雜菌扒生菜

 

正正常常一ｄ雜菇加個玻璃茨，底下放左生菜，清清地不錯啦！

齋拼盤

齋拼盤咩都有ｄ，包括雜菜春卷、粟米芯、千層腐皮、豆乾、甜酸齋，啱晒鍾意咩都試少少嘅我，雖然係煎炸野，但又唔會油淋淋！覺得甜酸齋最好食，甜甜酸酸好開胃！（雖則我本身都好好胃口）

 

菠蘿咕嚕肉

每次食飯叫這個菜，對我黎講，菠蘿先係主角，我淨係食菠蘿！朋友就話咕嚕肉個炸粉好薄，幾好食！

五柳素魚＜正到不得了＞

單講條魚的外形已經好吸引好可愛，廚師仲幫我地將條魚切到件件咁公整，好似西多士咁，加分！外層香脆，素魚肉的芋頭蓉做得好似雪糕咁幼滑不在講，芋頭蓉中間原來仲混合左冬菇、沙葛同紅蘿蔔，增添豐富的口感！點一點個五柳汁，嘩！簡直係錦上添花，正到不得了！

冬菇紅燒豆腐

無咩特別

腰果炒肉丁

無咩特別ｘ２！加上我唔食西芹同青豆！

素雜錦炒麵

其實炒麵底炸得好脆，好好食，不過大家已經好飽食唔落！

平均每人消費：$100

地址：大澳南涌14號
TIPS：‘東方小祇園’ｄ菜碟碟份量都好多，所以大家有機會去到可以叫住部份菜先，唔夠再後加，唔洗浪費！另外，大家唔好期望有好靚的裝潢，因為果度係人地屋企黎嫁（好似係）！

 

下篇講大澳小食仲有坐船出海睇中華白海豚！

-----------------------------------------------
你肯KEEP住睇, 我肯KEEP住寫!
 contact me: twentyonestyle@yahoo.com.hk

http://twentyonestyle.blogspot.hk/
http://twentyone.theztyle.com
http://blog.she.com/twentyone
http://blog.qooza.hk/twentyonestyle
http://www.openrice.com/restaurant/userinfo.htm?userid=756192